వేమన పద్యం దాని భావం.

మహతీ సాహితీ కవిసంగమం

ప్రతిరోజూ కవితా పండుగే

తేది:   06-04-2024.

 (  శనివారం)

అంశం:   పద్యం.      

 ( కవితాసంఖ్య-  6.)

శీర్షిక:      కోతి బుద్ధి. (వేమన పద్యం).

ప్రక్రియ:  ఆటవెలది పద్యం.

కవిసంఖ్య -43 .

కవి:  రచన : శ్రీమతి : పుల్లాభట్ల జగదీశ్వరీముార్తి

 కల్యాణ్. మహారాష్ట్ర .

వేమన పద్యం. 

-------------

కోతి నొకటి తెచ్చి కొత్త పుట్టము గట్టి

కొండముచ్ఛు లెల్ల గొలిచి నట్టు

నీతి హీనులొద్ద నిర్భాగ్యు లుందురూ 

విశ్వదాభిరామ వినుర వేమ!!

భావం.

-------

వేమన గారు రాసిన ఈ పద్యం , ఎంత అనుభవంతో రాసారో గాని, నేటి పరిస్థితులకు , మనిషి ప్రవర్తనకు , చాలా దగ్గర సంబంధం కలిగి ఉంది అనిపిస్తున్నది . 

కోతికి స్థిరమైన బుద్ధి అంటూ ఉండదు ,ఆలోచనా శక్తి అసలే ఉండదు. ఎవరి చేతిలో నైనా ఏదైనా వస్తువు ఉంటే ,

దానికి అవసరమా ,లేదా, అన్నది దానికి అక్కర్లేదు.

 అన్నిటినీ లాక్కోవడమే దాని పని . పోనీ లాక్కున్న తర్వాత తింటుందా ,వాడుకుంటుందా, అంటే అదీ తెలియదు .

లాక్కున్న వాటిని నలిపి, కొరికి. ముక్క ముక్కలు చేస్తుంది.

కావలసిన వారి దగ్గర ఉంచదు. అది కూడా అనుభవించదు.

అటువంటి కోతికి కొత్త బట్టలు కట్టి , కొండముచ్చులు అన్నీ కొలిచాయట. ఎందుకంటే , వాటికి కోతి చేసిన పనులు ఆనందాన్ని కలిగిస్తాయి తప్ప, దానివల్ల వచ్చే కష్టనష్టాలు వాటికి  తెలియవు. అందుకే అవి కూడా దాంతో పాటు పిచ్చిగా గెంతుతూ, దాని అల్లరికి వంతు పాడుతూ ,దాని చుట్టూ తిరుగుతూ ఉంటాయి. 

ఈ పద్యం భావం ఏమిటంటే నీతి, నియమం లేని వాడి దగ్గర 

నిర్భాగ్యులందరూ చుట్టూ చేరతారట. ఎందుకంటే వీళ్ళకి చేసేందుకు పనేమీ ఉండదు. 

నీతిలేని వాడికి పట్టం కట్టి, వాడి చుట్టూ తిరగడమే వీళ్ళ పని . వాడు చేస్తున్నది సభువుగా ఉందా ,  అసందర్భంగా ఉందా, అన్నది వీళ్లు ఆలోచించరు . ఎందుకంటే ఇవేవీ వీళ్ళకి అక్కర్లేదు. దొమ్ములాటలు చేయడం , ఒకరి వస్తువులను బలవంతంగా లాక్కోవడం , వాళ్లు బాధపడి ఏడుస్తూ ఉంటే, చూసి ఆనందించడం తప్ప ,వీళ్ళకి మరొక కాలక్షేపం ఉండదు.

ఈ భావాన్ని వేమన గారు ఒక చిన్న పద్యంలో ఎంతో చక్కగా  చెప్పారు.

వేమన గారు రాసిన ప్రతి  పద్యం లో ఏదో ఒక నీతి , సూక్తి దాగి ఉన్నాయి.

ఇటువంటి పద్యాలను చదవడం వల్ల మనకి , 

నేర్పించడం వల్ల పిల్లలకి, చాలా లోకజ్ఞానం కలుగుతుందన్నది మాత్రం నిజం.

ఈ పద్య భావం నా స్వీయ రచన.